გამარჯობა,
მე გრიგოლ კვიციანი ვარ, ზემო სვანეთიდან, სოფელ ბეჩოდან. პროფესიით ლანდშაფტის არქიტექტორი, ხოლო ამჟამად სოფლის მეურნეობით ვარ დაკავებული. ბოლო წლებში, ჩემში განსაკუთრებული ინტერესი ორგანულმა წარმოებამ გამოიწვია.
ყველაფერი ორი წლის უკან დაიწყო, როდესაც ჩემმა ოჯახის წევრმა, სახლში ინფორმაცია მოიტანა ძალიან კარგი პროექტის შესახებ, რომელიც ევროკავშირის, შვედეთის და ავსტრიის დაფინანსებით, პროექტ GRETA-ს ფარგლებში, მაღალმთიან რეგიონები ორგანული სოფლის მეურნეობის ხელშეწყობას გულისხმობდა.
ინიციატივა საკმაოდ საინტერესო ჩანდა და მეც გადავწყვიტე ბედი მეცადა და მივყევი პროექტის მიერ გამოქვეყნებულ ინსტრუქციას. რამდენიმე ეტაპის გავლის შემდეგ, დადებითი პასუხი მივიღე, ჩავერთე პროექტში და სწორედ აქ დაიწყო ჩემთვის სრულიად ახალი და საინტერესო პროცესი. ჩემი იდეა ზემო სვანეთში ორგანული მარწყვის მოყვანას და შესაბამის სასათბურე ინფრასტრუქტურის მოწყობას გულისხმობდა. ეს ერთი შეხედვით საკმაოდ უცნაური იდეა იყო, რადგან საუბარია იმ მკაცრ კლიმატურ პირობებზე რომელიც ზემო სვანეთშია, თუმცა ეს უცნაური იდეა დღეს უკვე წარმატებულ ბიზნესად იქცა.
დონორების დახმარებით სათბურის სრულად აწყობ-დამონტაჟება მოხდა, ასევე დაგვიფინანსეს ჩითილების შეძენა და რაც მთავარია მოგვამაგრეს აგროექსპერტი, რომლის რჩევებმა უდიდესი როლი შეასარულა მოსავლის დარგვიდან მოყვანამდე პროცესის სწორად მართვაში. დონორების მიერ გაწეულ მხარდაჭერის ფარგლებში, განსაკუთრებით გამოვყოფდი ჩატარებულ ტრენინგებს, რომლის შედეგად ჩემთვის საერთოდ უცხო საქმიანობაში ძალიან მნიშვნელოვანი ინფორმაცია მივიღე, რაც ეფექტურად გამოვიყენე პრაქტიკულ საქმიანობაში.
თავს უფლებას მივცემ და ვიტყვი, რომ დღევანდელი გადმოსახედიდან უკვე ნათლად ჩანს პროექტში ჩართვის დღიდან მიღებული ფასდაუდებელი დახმარება და სარგებელი. პირველ რიგში ვიტყვი, რომ, სვანეთში გაჩნდა დაინტერესება მარწყვის და ზოგადად კენკროვანი, ბიო მეურნეობისადმი, რადგან ჩემი და კიდევ რამდენიმე მეწარმის მაგალითი ბევრი ადგილობრივისთვის მოტივაციის მიზეზი გახდა. ასევე რეგიონში გაჩნდა შესაძლებლობა რომ სიახლეების დანერგვა რეალურია, რადგან მოგეხსენებათ მარწყვის მოყვანა სვანეთში ერთგვარი სიახლეა.
წამოწყება ნამდვილად შედეგიანი აღმოჩნდა, პირველ წელს 600 კილომდე მოსავალი გვგქონდა. ყოველ წელს მოსავლის 50%-იანი ზრდა გვაქვს, რადგან ვითვალისწინებთ ექსპერტის რეკომენდაციებს და დროთა განმავლობაში ვიხვეწებით. ყოველ წელს გვაქვს, მოსავლის 50%-იანი ზრდა, რადგან ვითვალისწინებთ ექსპერტის რეკომენდაციებს და დროთა განმავლობაში ვიხვეწებით, რადგან დაინტერესება სულ უფრო და უფრო იზრდება მთელს მსოფლიოში და თქვენ წარმოიდგინეთ ადგილობრივ ბაზარზეც.
მინდა სიხარულით აღვნიშნო, რომ წლის ბოლოს ველოდები ბიო სერტიფიკატს,
რაც დამატებით მოტივიაციას მაძლევს სასათბურე მეურნეობის გაფართოების კუთხით, როგორც
ბიო მარწყვის, ასევე ბიო კარტოფილის მოყვანის მხრივ. გულწრფელად ვისურვებდი ბევრ ისეთ პროექტს საქართველოში, როგორიც არის პროექტი
GRETA, რადგან უფრო მეტი შესაძლებლობა შეიქმნებოდა ქართველი მცირე მეწარმეებისთვის
განსაკუთრებით მაღალმთიან რეგიონებში.
დასასრულს ვიტყვი, რომ დაინტერესების შემთხვევაში მზად ვარ თანამშრომლობისთვის, იქნება ეს კომერციული თანამშრომლობა, თუ ბიო მიმართულებით ნებისმიერი ახალი წამოწყება. საკონტაქტოდ მეილის საშუალებით ვარ ხელმისაწვდომი: grigolikviciani52@gmail.com იმედია მალე სხვა ოფიციალური საკომუნიკაციო საშუალებებიც მექნება. წარმატებას გისურვებთ!
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განთვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე
ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა
და შვედეთის მხარდაჭერით, საქართველოში ავსტრიის განვითარების სააგენტო ახორციელებს.
პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის
შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში,
როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის